ສະຫະພາບເອີຣົບ (EU) ແລະ ສປປ ລາວ ໄດ້ຈັດກອງປະຊຸມເຈລະຈາຊ່ອງໜ້າ ຄັ້ງທີ 3 ເພື່ອກ້າວໄປສູ່ ການເຊັນສັນຍາການຄ້າໄມ້ແບບສະມັກໃຈ (VPA) ພາຍໃຕ້ ແຜນງານ ການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT)). ການເຈລະຈາ ໄດ້ຈັດຂຶ້ນໃນລະຫວ່າງ ວັນທີ 17-21 ມິຖຸນາ 2019 ທີ່ ບຣັດຊຽວ, ປະເທດ ເບວຢ້ຽມ. ສັນຍາການຄ້າໄມ້ດັ່ງກ່າວ ແມ່ນມີເປົ້າໝາຍເພື່ອສ້າງລະບົບ ການກວດກາຢັ້ງຢືນ ຜະລິດຕະພັນໄມ້ ທີ່ຖືກຕ້ອງຕາມກົດໝາຍ ທີ່ໄດ້ຂຸດຄົ້ນ ແລະ ສົ່ງອອກ ໂດຍ ສປປ ລາວ. ສັນຍາດັ່າງກ່າວນີ້ ຍັງຈະໄດ້ຊ່ວຍໃນການສົ່ງເສີມການຄ້າ ຜະລິດຕະພັນໄມ້ ທີ່ຖືກຕ້ອງຕາມກົດໝາຍ, ປັບປຸງ ການຄຸ້ມຄອງປ່າໄມ້ ແລະ ປະກອບສ່ວນ ເຂົ້າໃນການສະກັດກັ້ນ ການຂຸດຄົ້ນໄມ້ທີ່ຜິດກົດໝາຍ.
ທ່ານ ປອ, ພວງປາຣິສັກ ປຣະວົງວຽງຄຳ, ຮອງລັດຖະມົນຕີ ກະຊວງກະສິກຳ ແລະ ປ່າໄມ້, ຫົວໜ້າ ທີມງານເຈລະຈາ ຝ່າຍ ສປປ ລາວ ໄດ້ກ່າວວ່າ: ‘ລັດຖະບານ ແຫ່ງ ສປປ ລາວ ມີຄວາມມຸ່ງໝັ້ນ ໃນການ ສືບຕໍ່ ພັດທະນາ ຂະແໜງ ການປ່າໄມ້ ໃຫ້ມີຄວາມຍືນຍົງ. ການເຈລະຈາ ຂອງ ສປປ ລາວ ກັບ ສະຫະພາບເອີຣົບ ໄດ້ເປັນສວ່ນໜຶ່ງ ໃນຄວາມມຸ່ງໝັ້ນດັ່ງກ່າວ ເພາະວ່າ ການຈັດຕັ້ງປະຕິບັດ ສັນຍາ ດັ່ງກ່າວນີ້ ຈະຊ່ວຍ ເພີ່ມທະວີ ຄວາມເຂັ້ມແຂງ ທາງດ້ານ ການຄຸ້ມຄອງຕ່ອງໂສ້ການສະໜອງໄມ້ ແລະ ມີຄວາມຮັບຜິດຊອບ ໃນການຄຸ້ມຄອງປ່າໄມ້ ຂອງພວກເຮົາ’.
ນັບຕັ້ງແຕ່ການເຈລະຈາຊ່ອງໜ້າຄັ້ງທີ 2 ທີ່ໄດ້ຈັດຂື້ນ ໃນ ເດືອນ ມິຖຸນາ 2018, ສປປ ລາວ ໄດ້ດໍາເນີນການປັບປຸງ ນິຕິກຳ ໂດຍສະເພາະ ແມ່ນ ກົດໝາຍ ວ່າດ້ວຍ ປ່າໄມ້, ກົດໝາຍ ວ່າດ້ວຍ ທີ່ດິນ ແລະ ດໍາລັດວ່າດ້ວຍ ການປະເມີນຜົນກະທົບຕໍ່ສິ່ງແວດລ້ອມ. ການປ່ຽນແປງເຫຼົ່ານີ້ ໄດ້ໃຫ້ຄວາມກະຈ່າງແຈ້ງ ກ່ຽວກັບ ສິິ່ງທີ່ຈະໄດ້ພິຈາລະນາ ເປັນໄມ້ ທີ່ຖືກຕ້ອງຕາມກົດໝາຍ ພາຍໃຕ້ VPA ລະຫວ່າງ ສປປ ລາວ ແລະ ສະຫະພາບເອີຣົບ.
ໃນໄລຍະ ການເຈລະຈາ, EU ແລະ ສປປ ລາວ ໄດ້ ທົບທວນ ບັນດາ ນິຍາມໄມ້ທີ່ຖືກຕ້ອງຕາມກົດໝາຍ, ເຊິ່ງຈະໄດ້ນໍາໃຊ້ ເຂົ້າໃນການບົ່ງບອກເຖິງ ໄມ້ທີ່ຖືກຕ້ອງຕາມກົດໝາຍ. ສປປ ລາວ ໄດ້ມີຄວາມຄືບໜ້າ ໃນການຮ່າງ ນິຍາມໄມ້ທີ່ຖືກຕ້ອງຕາມກົດໝາຍ ຂອງໄມ້ທີ່ມາຈາກ ເຂດຫັນປ່ຽນທີ່ດິນປ່າໄມ້ ແລະ ໄມ້ນໍາເຂົ້າ. ສ່ວນ ວຽກງານ ກ່ຽວກັບ ປ່າຜະລິດ, ພັນທະກ່ຽວກັບການນຳໃຊ້ແຮງງານ ແລະ ການປຸງແຕ່ງໄມ້ ແລະ ການຄ້າໄມ້ ທີ່ໄດ້ຕົກລົງກັນ ໃນກອງປະຊຸມຄັ້ງກ່ອນ ກໍໄດ້ມີຄວາມຄືບໜ້າ ທີ່ໂດດເດັ່ນເຊັ່ນດຽວກັນ.
ນອກຈາກນັ້ນ, ຝ່າຍລາວ ຍັງໄດ້ລາຍງານ ຄວາມຄືບໜ້າ ກ່ຽວກັບ ຄວາມສາມາດນໍາໃຊ້ປ່າໄມ້ ຂອງຊຸມຊົນເພື່ອຈຸດປະສົງທາງດ້ານການຄ້າໄດ້ ພາຍໃຕ້ກົດໝາຍປ່າໄມ້, ຊຶ່ງມີທ່າແຮງ ເຮັດໃຫ້ເພີ່ມລາຍຮັບ ປັບປຸງຊິວິດການເປັນຢູ່ ໃຫ້ແກ່ ບັນດາຊຸມຊົນເຫຼົ່ານີ້, ແລະ ສະໜອງ ແຫຼ່ງວັດຖຸດິບ ເພີ່ມຕື່ມ ໃຫ້ແກ່ ທຸລະກິດຂະໜາດນ້ອຍ ແລະ ຂະໜາດກາງ ແລະ ການຜະລິດ ຜະລິດຕະພັນໄມ້ ຂອງຄົວເຮືອນ. ສປປ ລາວ ຍັງໄດ້ສະເໜີ ຂໍ້ມູນລະອຽດເພີ່ມຕື່ມ ກ່ຽວກັບ ການວາງໂຄງຮ່າງການຈັດຕັ້ງ ໃນການ ຈັດຕັ້ງປະຕິບັດ VPA ແລະ ລະບົບຄ້ຳປະກັນໄມ້ທີ່ຖືກຕ້ອງຕາມກົດໝາຍ ໃນຕໍ່ໜ້າ.
ທ່ານ Jorge Rodriguez Romero, ຮອງຫົວໜ້າໜ່ວຍງານ, ກົມສິ່ງແວດລ້ອມ ຂອງສະຫະພາບເອີຣົບ ໄດ້ກ່າວວ່າ: ‘ພວກເຮົາມີຄວາມຍິນດີ ຕໍ່ກັບຄວາມຄືບໜ້າ ທີ່ ສປປ ລາວ ໄດ້ ພັດທະນາ ລະບົບຄໍ້າປະກັນໄມ້ທີ່ຖືກຕ້ອງຕາມກົດໝາຍ ໃນ VPA ຂອງຕົນ. ພວກເຮົາ ກໍ່ຢາກເຫັນ ການທົດລອງນຳໃຊ້ ແລະ ການຈັດ ຕັ້ງປະຕິບັດລະບົບດັ່ງກ່າວ ໂດຍໄວ, ຊຶ່ງເປັນບາດກ້າວທີ່ສໍາຄັນ ໃນການຄຸ້ມຄອງປ່າໄມ້ທີ່ດີ, ແລະ ການຄ້າໄມ້ທີ່ຖືກຕ້ອງຕາມກົດ ໝາຍ ໃນ ອານາຄົດ ແລະ ຈະມີຜົນກະທົບທາງບວກ ຕໍ່ຂະແໜງການປ່າໄມ້ ຂອງ ສປປ ລາວ’
ຫຼັງຈາກສຳເລັດການເຈລະຈາຄັ້ງນີ້ ແລ້ວ, ກໍຈະໄດ້ມີການສືບຕໍ່ ທົບທວນຄືນ ແລະ ປັບປຸງ ນິຍາມໄມ້ທີ່ຖືກຕ້ອງຕາມກົດ ໝາຍ ແລະ ລະບົບຄ້ຳປະກັນໄມ້ທີ່ຖືກຕ້ອງຕາມກົດໝາຍ. ໂຄງການຮ່ວມມື ເຢຍລະມັນ ເພື່ອການພັດທະນາ ‘ໂຄງການປົກປັກຮັກສາ ແລະ ນຳໃຊ້ລະບົບນິເວດປ່າໄມ້ ແລະ ຊີວະນາໆພັນ ແບບຍືນຍົງ (ProFEB)‘, ທີ່ຈັດຕັ້ງປະຕິບັດໂດຍ GIZ, ພາຍໃຕ້ການຊີ້ນໍາ ຂອງຫ້ອງການປະສານງານ FLEGT, ກົມກວດກາປ່າໄມ້, ຈະໄດ້ສືບຕໍ່ ສະໜັບສະໜູນ ລັດຖະບານລາວ ແລະ ບັນດາພາກສ່ວນທີ່ກ່ຽວຂ້ອງ ເພື່ອໃຫ້ບັນລຸເປົ້າໝາຍ ການເຊັນສັນຍາ VPA ກັບ ສະຫະພາບເອີຣົບ.
ສັນຍາການຄ້າໄມ້ແບບສະໝັກໃຈ ໄດ້ສ້າງ ໂອກາດທີ່ດີໃຫ້ແກ່ ສປປ ລາວ ເພື່ອຮ່ວມກັບບັນດາປະເທດຕ້ານ ແລະ ສະກັດກັ້ນການຂຸດຄົ້ນໄມ້ທີ່ຜິດກົດໝາຍ ແລະ ປັບປຸງການຄຸ້ມຄອງປ່າໄມ້ ໃນທົ່ວໂລກ. ໃນປັດຈຸບັນ ມີ 15 ປະເທດໃນ ໂລກ ທີ່ກຳລັງດຳເນີນ ການເຈລະຈາ ຫຼື ຈັດຕັ້ງປະຕິບັດ VPAs ກັບ EU.