ແຜນງານ FLEGT VPA ໄດ້ຮັບການຊີ້ນໍາໂດຍທ່ານລັດຖະມົນຕີວ່າການກະຊວງກະສິກໍາ ແລະ ປ່າໄມ້, ເຊິ່ງເປັນປະທານ ຄະນະກໍາມະການຊີ້ນໍາລະດັບຊາດໃນແຜນງານ FLEGT, ທີ່ໄດ້ຮັບການສະໜັບສະໜູນຢ່າງໃກ້ຊິດຈາກລັດຖະມົນຕີຊ່ວຍວ່າການກະຊວງກະສິກໍາ ແລະ ປ່າໄມ້ (ເຊິ່ງເປັນຫົວໜ້າທີມງານເຈລະຈາ), ລັດຖະມົນຕີຊ່ວຍວ່າການກະຊວງອຸດສາຫະກໍາ ແລະ ການຄ້າ ແລະ ລັດຖະມົນຕີຊ່ວຍວ່າການກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ. ຄະນະກໍາມະການຊີ້ນໍາລະດັບຊາດ ໄດ້ຮັບການແຕ່ງຕັ້ງຂຶ້ນຢ່າງເປັນທາງການ ພາຍໃຕ້ຂໍ້ຕົກລົງ ເລກທີ 65/ນຍ.
ຄະນະກໍາມະການຊີ້ນໍາລະດັບຊາດ ປະກອບມີ ລັດຖະມົນຕີວ່າການ ກະຊວງກະສິກໍາ ແລະ ປ່າໄມ້ (ເປັນປະທານ), ລັດຖະມົນຕີຊ່ວຍວ່າການ ກະຊວງກະສິກໍາ ແລະ ປ່າໄມ້ (ຫົວໜ້າທີມງານເຈລະຈາ), ລັດຖະມົນຕີຊ່ວຍວ່າການ ກະຊວງອຸດສາຫະກໍາ ແລະ ການຄ້າ, ລັດຖະມົນຕີຊ່ວຍວ່າການ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ, ຫົວໜ້າກົມ ກວດກາປ່າໄມ້ (ເຊິ່ງເປັນສະມາຊິກໃນຄະນະກໍາມະການຊີ້ນໍາລະດັບຊາດ ແລະ ທັງເປັນຫົວໜ້າທີມງານເຈລະຈາ), ຫົວໜ້າກົມ ແລະ ຮອງຫົວໜ້າກົມຂອງບັນດາກົມຕ່າງໆທີ່ກ່ຽວຂ້ອງ.
ຄະນະກໍາມະການຊີ້ນໍາລະດັບຊາດ ມີໜ້າທີ່:
- ສະເໜີຮອງນາຍົກລັດຖະມົນຕີຜູ້ຊີ້ນໍາວຽກງານຂົງເຂດເສດຖະກິດຈາລະຈອນ ພິຈາລະນາແຜນຍຸດທະສາດ, ແຜນການໄລຍະຍາວ, ແຜນການປະຈໍາປີ ກ່ຽວກັບການກະກຽມການເຈລະຈາເຂົ້າຮ່ວມຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ແລະ ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT) ແລະ ນຳພາການຈັດຕັ້ງປະຕິບັດໃຫ້ປາກົດຜົນເປັນຈິງ.
- ຄົ້ນຄວ້າ ແລະ ຈັດຕັ້ງປະຕິບັດຕາມຂະບວນການທີ່ເໝາະສົມ ເພື່ອ ນໍາໄປສູ່ຂະບວນການກະກຽມການເຂົ້າຮ່ວມຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ແລະ ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT).
- ແຕ່ງຕັ້ງຄະນະເຈລະຈາ, ກໍານົດແບບແຜນ, ຮູບແບບ ແລະ ວິທີການຈັດຕັ້ງປະຕິບັດສໍາລັບການເຈລະຈາ ຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ລະຫວ່າງ ສປປ ລາວ ກັບ ສະຫະພາບເອີຣົບ.
- ພິຈາລະນາຕົກລົງ ແລະ ໃຫ້ທິດຊີ້ນໍາ ກ່ຽວກັບໂຄງປະກອບການຈັດຕັ້ງປະຕິບັດ, ບຸກຄະລາກອນ ສໍາລັບ ການຈັດຕັ້ງປະຕິບັດ ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ (FLEGT) ໃຫ້ມີຄວາມເໝາະສົມ ແລະ ມີປະສິດທີຜົນ ເປັນຕົ້ນແມ່ນ ຄະນະເຈລະຈາ, ຄະນະກໍາມະການຮັບຜິດຊອບຊຸກຍູ້ການເຈລະຈາ, ຄະນະປະສານງານຮັບຜິດຊອບດ້ານວິຊາການ ແລະ ຫ້ອງການປະສານງານ FLEGT Standing Office.
- ພິຈາລະນາຕົກລົງ ກ່ຽວກັບ ແຜນການຈັດຕັ້ງປະຕິບັດ ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ແລະ ສະຫະພາບເອີຣົບ ລວມທັງ ແຜນດຳເນີນງານປະຈໍາປີ ຂອງແຜນງານ ແລະ ກິດຈະກໍາ ຢູ່ບັນດາແຂວງທົດລອງ.
- ຊີ້ນໍາ, ຕິດຕາມ ແລະ ກວດກາ ການຈັດຕັ້ງປະຕິບັດ ແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ແລະ ສະຫະພາບເອີຣົບ ລວມທັງ ແຜນດຳເນີນງານປະຈໍາປີ ສໍາລັບວຽກງານດັ່ງກ່າວ.
- ສະເໜີລະບົບການຮັບປະກັນຄວາມຖືກຕ້ອງຕາມກົດໝາຍຂອງໄມ້ (TLAS) ແລະ ນິຍາມຄວາມຖືກຕ້ອງຂອງໄມ້ (TLD).
- ພິຈາລະນາ ແລະ ຮັບຮອງເບື້ອງຕົ້ນ ກ່ຽວກັບ ຮ່າງ ຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ (VPA) ລວມທັງເອກະສານຄັດຕິດ ເພື່ອນໍາສະເໜີຕໍ່ກະຊວງທີ່ກ່ຽວຂ້ອງ ຄົ້ນຄວ້າພິຈາລະນາ ແລະ ນໍາສະເໜີ ລັດຖະບານ ເພື່ອອະນຸມັດ.
- ເຜີຍແຜ່ຄວາມຄືບໜ້າ ແລະ ຜົນຂອງການເຈລະຈາ ໃຫ້ຂະແໜງທີ່ກ່ຽວຂ້ອງ ເພື່ອຈັດຕັ້ງຜັນຂະຫຍາຍໃນແຕ່ລະໄລຍະ.
- ສະຫຼຸບ ແລະ ລາຍງານ ການເຄື່ອນໄຫວວຽກງານຂອງຕົນ ຕໍ່ລັດຖະບານຢ່າງເປັນປົກກະຕິ.
ຄະນະຊຸກຍູ້ການເຈລະຈາ ແລະ ຄະນະປະສານງານຮັບຜິດຊອບດ້ານວິຊາການ ໃນການສະໜັບສະໜູນ ການເຈລະຈາ FLEGT VPA ແມ່ນໄດ້ຮັບການຈັດຕັ້ງຂຶ້ນ ຕາມຂໍ້ຕົກລົງເລກທີ 1915/ກປ.
ຫ້ອງການປະສານງານ FLEGT Standing Office ເຊິ່ງມີໜ້າທີ່ເປັນກອງເລຂາຂອງແຜນງານ FLEGTເຊິ່ງຕັ້ງຢູ່ກົມກວດກາປ່າໄມ້, ກະຊວງກະສິກໍາ ແລະ ປ່າໄມ້, ໂດຍແມ່ນ ຫົວໜ້າກົມກວດກາປ່າໄມ້ເປັນຜູ້ຊີ້ນໍາໂດຍກົງ, ເຊິ່ງເປັນຜູ້ປະສານງານ FLEGT ຢູ່ ສປປ ລາວ.